أشرف زكي يرد على التصريحات المنسوبة لمادلين طبر عن الزعيم: “كلامها خطير وجرحني ولا يليق بأي فنان”
علق الفنان أشرف زكي نقيب المهن التمثيلية على التصريحات المنسوبة للفنانة اللبنانية مادلين طبر حول الزعيم عادل إمام ومطالبتها عائلته بالإفراج عنه، وذلك في مداخلة هاتفية مع الإعلامية بسمة وهبة ببرنامج “90 دقيقة” والذي يعرض على قناة “المحور”.
وعلق أشرف زكي قائلاً: “أنا عاوز الأول أطمن الناس وأقول الحقيقة كاملة على مسؤوليتي الزعيم عادل إمام بحالة جيدة جداً وأنا من أيام قليلة جداً اتصلت بيه وهحكيلك المكالمة، أنا اتكلمت قالي أهلاً يا أشرف أخبارك إيه؟، قولت له ازيك يا زعيم واحشنا، قالي طالما أنا واحشك ما تيجي تعالي، واطمن وسأل على أسرتي بالأسماء ومقفلش غير لما سألني هتيجي امتى قولت له هخلص المهرجان وأجيلك”.
واستكمل: “أستاذ رامي إمام والأستاذ محمد عادل إمام كانوا بيعملوا فيلم اسمه أبو نسب وكانوا بيربطوا الليل بالنهار عشان يخلصوا الفيلم وأنا بكلمك لأن بنتي مساعد مخرج في الفيلم والأستاذ رامي أنا عمري في حياتي ما كلمته والراجل اتأخر عليا، بعد ما بيخلص تصوير بيكلمني وقابلته روحنا من كام يوم قاعدين في كافيه في الصحراوي، والراجل بيرد لكن ممكن يبقي عنده تصويره حضرتك مثلاً لما بتطلعي في البرنامج أكيد مش هتردي على التليفونات، ده راجل بيصور 10 ساعات 12 ساعة في اليوم”.
وأنهى حديثه قائلاً: “لم أسمع من قبل شكوي أن أستاذ رامي إمام مبيردش على حد وهو لما بيكون بيصور أكيد مش هيرد، وبعدين لو في حاجة مهمة وعاوز أستاذ رامي وهو ميعرفنيش هبعت له رسالة وأقوله عاوزك في حاجة والراجل بيكلمني على طول لكن مبيكلمنيش وهو في وسط التصوير، وكلام مادلين طبر خطير جداً وميتقالش على أي فنان ما بالك بالزعيم فأنا شخصياً بعتذر عن ما جاء في هذا البوست، وأنا هتكلم مع الفنانة مادلين طبر ومرة أخيرة أنا بعتذر عن ما جاء في هذا البوست”.
للمزيد : تابعنا هنا ، وللتواصل الاجتماعي تابعنا علي فيسبوك وتويتر .
